Predblagdansko raspoloženje Kate Ottozez

Pripremila: V.D. 

Dobar dan, do Božića još nekoliko dani! E, da .. vani skoro litno doba, taman za naj bikini stajl, kako bi vi fešn znalci rekli! Nego ni meni ni do lita ni do f...ešna! Lipi moji nekakova me fjaka uvatila! Jutroske kad san ve svoje oči otvorila i pogljedala kroz vaj svoj prozor, ma srce me zabolilo od nekakove tuge! Mraaak! Nigdi ničesa... vi psi nit av, a o mačkami da ni ne divanin..nema mrnjav nit ne krivljavine! Pivac ne piva, i njemu se smračilo! Istina da je zatvoren u bajti di nema ni sunca ni miseca dok se ne sitin otvorit vrata, a na kraju krajev ča ima on kukurikat dok mu ja ne kažen! Ipak san ja njemu "šefika""el! Baren nekon! Tolko o pivcu i pivanju! Nego da se vrnen u mrakač! Vako, dakle mraaak... nema svitla, e pa neću nit ja palit žarulju i ja bi uštedila ku crkavicu! I takooo, sitin se dani kada san kaj dite u vin danima uživala zajedno sa svojin starcima oko blagdanov, pa pisala non Nikoli, pa Luci , a da ne divanin o dedu Mrazu! Sitila san se kako je kod mog ćaće u firmi svake godine bila fešta od darov..ded je nas dicu častil, je da smo se krivili od straja jer naj ki je bil ded, a minjali su se svake godine, bil drven kaj drvenarija, ali bilo lipppoooo.. i kad bi seli njemu u krilo i kad bi punul: Kako se zoveš? - dite bi man u nesvist palo od ne pare! Al bilo je lipoooo.. a školaaa.. aaajmeeee... priredbov za svu dicu... pa ded bi jopet al naj pristojan podilil dare dici..pa pismice, pa bi i snig opičil.. aaa tek kod kuće...fešta od lipote..oš kitilo se , mirišalo sve na mir i dobro! A saaad.. muka me devetera vata! Prvo, ka ča san napisala, litoooo...sniga ni za lik... drugooo...maslačak procvital... treće..ima priredbov ali sve nekakova umjetnina...svaki za se... i to ponekad u noj tajnosti da niki ne sazne! No ča se reklamira to i neki dojde vidit! Ča je još gori i dite koje ima ča dobit ne smi reć da je dobilo jer su mu kod kuće rekli neeee.. a zač? Da ne bi se saznalo imadu li njegovi ča novac jer man ve inspekcije trčidu kako bi vidili oklen tolko za poklone! A firme???? Oš ih nema, propale , a i ne ča su ostale borbu vodidu oko toga ki će na ku stolicu sest! Pokloni su za nji špansko selo! Ča se tiče vog jadnika DEDA.. jadan da jadniji ne more bit! Srićon raste mu , onako poprilično, i vidi mu se..dobro je dok mu se vidi, na trbuv mislin..al i njemu je puna va ofucana kapa svega! Nit ga ki zove nit mu ki piše, a znan iz nih izvorov da je to strogo i zabranil! Rekal je : Dok narod ne dojde sebi, a neće u skoro vrime, ja iden u mirovinu! 

I ča da mu kažen, niš..razumin ga..svi smo se pokvarili kaj na jaja ča kupujemo po vin centrima, ben ti kad ih razbiješ, smrdidu na kilometar, ma kakova skeptička! I nač smo došli..na niš.. jeben ti merikanizaciju, jeben ti vu vrimensku prominu, jeben ti pivca kaj ne piva kako mu je va natura odredila i jeben ti starost ka više i ni ka ča je nekad bila. I ne čudin se vom jadniku ča piva: Ooooj medvide krupna životinjooo, ča si mene u kući ostaviooo, ja san danas se napioooo i žene san se ostavioooo....ooooj! Živil ja sebi kako nebi !!
Vaša Kate